1Ch 10 | NdeIBE | STEP | AmaFilisti alwa labako-Israyeli; abako-Israyeli babaleka, abanengi babo babulawelwa eNtabeni yase-Gilibhowa.

1 Chronicles 10

Ukuzibulala kukaSawuli

1 AmaFilisti alwa labako-Israyeli; abako-Israyeli babaleka, abanengi babo babulawelwa eNtabeni yase-Gilibhowa.

2 AmaFilisti axotshana loSawuli kanye lamadodana akhe, abulala amadodana akhe uJonathani, lo-Abhinadabi kanye loMaliki-Shuwa. 3 Kwaba lokulwa okwesabekayo lapho uSawuli ayengakhona kwaze kwathi abalwa ngemitshoko sebemxhumile, bamlimaza.

4 USawuli wathi encekwini yakhe yokumthwalela izikhali, “Hwatsha inkemba yakho ungiqedisele, ngoba kungenzeka ukuthi bangifice laba abangasokanga, bangenze ihlazo.” Kodwa umphathi wezikhali zakhe wathuthumela ngokwesaba ukukwenza lokho, ngakho uSawuli wathatha inkemba yakhe waziwisela phezu kwayo. 5 Umphathizikhali ebona ukuthi uSawuli wayesefile, laye waziwisela phezu kwenkemba yakhe, wafa.

6 Ngakho kwaba yikufa kukaSawuli kanye lamadodana akhe, bonke abendlu yakhe bafa ndawonye.

7 Bonke abako-Israyeli ababesesigodini bebona ukuthi ibutho selibalekile lokuthi uSawuli kanye lamadodana akhe basebefile, baphuma bafulathela amadolobho abo babaleka. AmaFilisti afika angena azihlalela kulawomadolobho.

8 Ngosuku olulandelayo, amaFilisti esesiyakhuthuza izidumbu zabafileyo, afumana uSawuli lamadodana akhe abafela eNtabeni yaseGilibhowa. 9 Bamkhuthuza baze baquma bathatha ikhanda lakhe lezikhali zakhe, basebethuma izigijimi kulo lonke elamaFilisti ukuthi ziyobikela izithombe labantu bakibo.

10 Izikhali zakhe bazifaka ethempelini labonkulunkulu babo kwathi ikhanda lakhe balibeka ethempelini likaDagoni.

11 Abantu bonke baseJabeshi Gileyadi sebezwile konke amaFilisti ayekwenzile kuSawuli, 12 wonke amaqhawe alezibindi ahamba ayathatha isidumbu sikaSawuli lezamadodana akhe aya lazo eJabheshi. Basebengcwaba amathambo abo ngaphansi kwesihlahla esikhulu eJabheshi, bazila izinsuku eziyisikhombisa.

13 USawuli wafa ngoba wayengathembekanga kuJehova; kaligcinanga ilizwi likaJehova wakhe waze wayadinga ukuqondiswa yizangoma, 14 esikhundleni sokukhuleka kuJehova uNkulunkulu. Ngakho uJehova wamenza wafa wathatha ubukhosi wabunika uDavida indodana kaJese.